પૂર્વ કેન્દ્રીય મંત્રી અને NCP સુપ્રીમો શરદ પવારે બુધવારે ભારતીય જનતા પાર્ટીના નેતૃત્વવાળી સરકારો પર આકરા પ્રહારો કર્યા હતા. પવારે કહ્યું કે આ સરકારમાં બેરોજગારી એ હદે વધી ગઈ છે કે લગ્ન લાયક થઈ ચૂકેલા છોકરાઓને છોકરીઓ પણ નથી મળી રહી. તેમણે કહ્યું કે આનાથી સામાજિક સમસ્યાઓ સર્જાઈ રહી છે પરંતુ સરકાર નવા ઉદ્યોગો સ્થાપવાની કોઈ તક આપી રહી નથી. પવારે ખેડૂતોના મુદ્દે પણ ભાજપ સરકારો પર પ્રહારો કર્યા હતા.
‘સમુદાયો વચ્ચે તિરાડ ઊભી કરવામાં આવી રહી છે’
પુણેમાં એનસીપીના જન જાગરણ અભિયાનને લીલી ઝંડી આપતાં પહેલાં પવારે કહ્યું કે સમુદાયો વચ્ચે તિરાડ ઊભી કરવામાં આવી રહી છે. તેમણે કહ્યું કે સરકાર મોંઘવારી અને બેરોજગારી જેવા વાસ્તવિક મુદ્દાઓ પરથી ધ્યાન હટાવવાનો પ્રયાસ કરી રહી છે. પવારે કહ્યું, ‘દેશમાં ભૂખમરાની સમસ્યાનો ઉકેલ આવી શકે છે કારણ કે આપણા ખેડૂતોએ ઉત્પાદન વધાર્યું છે, પરંતુ સત્તામાં બેસેલા લોકો ખેડૂતોને યોગ્ય મહેનતાણું આપવા તૈયાર નથી, બલ્કે તેઓ વચેટિયાઓના હિતોનું રક્ષણ કરી રહ્યા છે અને સામાન્ય લોકોને મોંઘવારીની ખીણમાં ધકેલી રહ્યા છે.’
‘યુવાનોને નોકરી માંગવાનો અધિકાર છે’
પૂર્વ કેન્દ્રીય કૃષિ મંત્રીએ શિક્ષણ અને બેરોજગારીના મુદ્દે પણ સરકારને ઘેરી. પવારે કહ્યું કે આજનો યુવા શિક્ષિત છે અને તેને નોકરીની માંગ કરવાનો અધિકાર છે. તેમણે કહ્યું કે મહારાષ્ટ્રમાંથી ઉદ્યોગો બહાર જઈ રહ્યા છે, હાલના ઉદ્યોગોને કોઈ પ્રોત્સાહન આપવામાં આવી રહ્યું નથી અને નવા વ્યવસાયો સ્થાપવાની કોઈ તક આપવામાં આવી રહી નથી, જેના કારણે બેરોજગારી વધી રહી છે. જણાવી દઈએ કે શરદ પવાર કેન્દ્ર અને રાજ્યોની ભાજપ સરકારો પર પ્રહારો કરી રહ્યા છે અને બેરોજગારી અને મોંઘવારીનો મુદ્દો ઉઠાવી રહ્યા છે.
શરદ પવારે સંભળાવ્યો એક કિસ્સો
પવારે કહ્યું, “એકવાર યાત્રા દરમિયાન, એક ગામના ચાર રસ્તા પર 25-30 વર્ષની વયના 15-20 યુવાનોને મળ્યો. મેં તેમને પૂછ્યું કે તેઓએ શું કર્યું છે. કેટલાકે કહ્યું કે તેઓ ગ્રેજ્યુએટ છે, તો કેટલાકે કહ્યું પોસ્ટ ગ્રેજ્યુએટ છે. જ્યારે મેં તેમને પૂછ્યું કે શું તેઓ પરિણીત છે, તો બધાએ ના પાડી. મેં જ્યારે તેમને કારણ પૂછ્યું તો તેમણે કહ્યું કે તેમની પાસે નોકરી ન હોવાથી કોઈ તેમને કન્યા આપવા તૈયાર નથી. પવારે કહ્યું કે આ ફરિયાદો ગ્રામીણ વિસ્તારોમાં વધુ સંભળાઈ રહી છે.”
